जनकपुरधाम : धनुषाको सबैला नगरपालिकास्थित रघुनाथपुर यतिखेर शोकमग्न छ । मंगलबारदेखि नै गाउँलेहरु मलिन मुद्रामा देखिएका छन् ।

गत मंगलबार मध्यरातमा प्रहरी हिरासतमा २४ वर्षीय युवक शम्भु सदा मुसहर झुण्डिएको अवस्थामा मृत भेटिएपछि गाउँलेमा आशंका र आक्रोश छ । उनीहरु शव बुझ्न तयार छैनन् । आत्महत्या नभएर हत्या गरेको हुनसक्ने भन्दै परिवार र आफन्त आक्रोशित छन् । शम्भुको गाउँ सबैलाका बासिन्दाहरु जनकपुरमा पुगेर घटनाको सत्य तथ्य छानविन गर्न माग गर्दै प्रदर्शन गरिरहेका छन् ।

सवारी दुर्घटनाका प्रतिवादी शम्भु यादव इलाका प्रहरी कार्यालय सबैलाको हिरासतमा १६ औं बसेर मध्यरातमा शौचालयमा झुण्डिएको अवस्थामा फेला परेका थिए । प्रहरीले भने उनको आत्महत्या नै भएको ठहर गरेको छ । मृतकका शाशूले भने आफ्ना ज्वाइँले हिरासतबाट नछुटाए त्यहीँ हत्या गर्ने षड्यन्त्र गरिरहेको सूचना पहिले नै पाएको दावी गरेकी छन् ।

‘मेरो ज्वाइँले हामीसँग मलाई छोडाउनुस्, नभए मलाई यहीँ मार्छन् भन्नुभएको थियो । हिरासतमा मेरो ज्यान खतरामा छ भन्नु भएको थियो,’ मृतककी शाशूले भनिन् । प्रहरीले शवको मुचुल्का उठाउँदा सर्ट र भेस्टको सहारामा शौचालयमा झुण्डिएको, मुखमा कपडा कोचिएको दृश्य देखेकाले घटनाप्रति आशंका बढेको गाउँले र आफन्त बताउँछन् ।

प्रहरी हिरासतमा मृत्यु भएका शम्भुको शव हाल जनकपुरधाम स्थित प्रादेशिक अस्पताल शवगृहमा राखिएको छ । सोही ठाउँमा पुगी गाउँलेहरुले सोमबार पनि प्रदर्शन गरेका छन् । शम्भुको परिवार विपन्न छ । सबैलामा ५ धुरमा झुप्रोको घर छ । शम्भुका एक छोरी, एक भाई र आमाबुवा छन् ।

अन्तिम पटक अध्यावधिक गरिएको Posted on

प्रतिक्रिया दिनुहोस्