नेपाली संगीत क्षेत्रमा पछिल्लो समय उदाउँदै गरेका गायक, गीतकार तथा संगीतकार आयुष मगरले छोटो समयमै आफ्ना गीतमार्फत दर्शक र श्रोताको ध्यान खिच्न सफल भएका छन्। रुकुमबाट सुरु भएको उनको सांगीतिक यात्रा अहिले अमेरिकासम्म पुगेको छ। “माया पनि बसेकै थियो“, “लैजाने छु तिमीलाई” र हालै चर्चामा रहेको “कान्छी” जस्ता गीतमार्फत उनले आफूलाई नयाँ पुस्ताका आशालाग्दा कलाकारका रूपमा स्थापित गर्दै लगेका छन्। आयुष मगरसँग गरिएको छोटो कुराकानीः
प्रश्न: तपाईंको सांगीतिक यात्रा कसरी सुरु भयो?
आयुष मगर: सानैदेखि संगीत सुन्न र गुनगुनाउन मन पर्थ्यो। बिस्तारै गीत लेख्न थालेँ, अनि आफ्नै सिर्जना रेकर्ड गर्ने इच्छा जाग्यो। त्यही रुचि अहिले पेशाजस्तै बनेको छ।
प्रश्न: तपाईंका गीतहरूमा प्रेम, सम्झना र दूरीका भाव धेरै देखिन्छन्। यसको कारण के हो?
आयुष मगर: मैले भोगेका अनुभव र देखेका सम्बन्धहरू नै गीतमा आउँछन्। विदेशमा बस्दा घर, साथीभाइ र आफ्ना मान्छेको सम्झना धेरै आउँछ। सायद त्यसैले ती भाव गीतमा स्वाभाविक रूपमा मिसिन्छन्।
प्रश्न: “कान्छी” गीतले राम्रो प्रतिक्रिया पाइरहेको छ। यो सफलतालाई कसरी लिनुभएको छ?
आयुष मगर: एकदमै खुसी लागेको छ। श्रोताले गीतलाई आफ्नो बनाइदिनुभयो। लाखौँ मानिसले हेर्नु र सुन्नु कलाकारका लागि ठूलो प्रेरणा हो।
प्रश्न: तपाईंका म्युजिक भिडियोहरू पनि सिनेम्याटिक शैलीका हुन्छन्। यसमा किन जोड दिनुहुन्छ?
आयुष मगर: मेरो लागि गीत केवल सुन्ने कुरा मात्र होइन, महसुस गर्ने कुरा पनि हो। त्यसैले गीतको भावनालाई दृश्यमार्फत पनि दर्शकसम्म पुर्याउने प्रयास गर्छु। भिडियोले कथा अझ स्पष्ट बनाउँछ भन्ने लाग्छ।
प्रश्न: आगामी दिनमा श्रोताले आयुष मगरबाट के अपेक्षा गर्न सक्छन्?
आयुष मगर: नयाँ गीतहरूमा काम भइरहेको छ। आफूलाई दोहोर्याउनेभन्दा फरक–फरक कथा र भावना लिएर आउन चाहन्छु। श्रोताले मन पराउने खालको इमानदार संगीत बनाइरहने प्रयास जारी रहनेछ।
